mércores, 14 de febreiro de 2018

UN SABOROSO ENTROIDO!!!

Despois de traballar durante varios días, papás, mamás, alumnos, alumnas, mestres e mestras, por fin chegou o día de saír á rúa a lucir os nosos disfraces. O tema do Entroido deste ano foi a alimentación saudable, xa que é o tema do proxecto deste curso.
A ANPA coa axuda das familias realizou unha chulísima carroza, que representaba unha cociña, na que a nosa mascota, Papirus, era o chef.



Os nenos e nenas de infantil convertéronse en riquísimos amorodos.


Os rapaces e rapazas de 1º foron apetitosas cenorias.


De doces tarros de mel ían os de 2º e as súas mestras de apicultoras.



Peixiños de vivas cores foron os de 3º.


Camareiros e camareiras profesionais os de 4º.


A rapazada de 5º foi de libros de cociña.


Os de 6º foron os chefs do desfile.


 O grupo de gaitas Manxadoira foi animando coa súa música a comitiva. 


Encabezando o desfile, a nosa mascota.


Despois do percorrido, cantamos as cantigas na carpa instalada na Praza do Concello. Se queres ler a letra das cancións, preme na seguinte imaxe.


Xa de volta no colexio, puxémonos morados con todas as delicias do Entroido : chulas, filloas, orellas...
Foi unha xornada de troula e diversión. Se queres ver o ben que o pasamos olla o seguinte vídeo.

mércores, 7 de febreiro de 2018

GONZALO MOURE VISITA O BIBLIOCASTELO


Hoxe, o escritor Gonzalo Moure encheu de "Palabras de Caramelo" ( título do libro que engaiolou aos nenos e nenas de cuarto) a nosa biblioteca. Falounos de Kori ,o protagonista da historia, de Nadira,  Fatimetsu e doutros nenos saharauis que viven en campamentos de refuxiados. Contounos como xurdiu a idea deste fermoso libro. Foi a raíz dunha conversa que mantivo con Fatimetsu, unha nena xorda que un día viu a unha cría de camelo que despois de mamar movía os beizos e preguntoulle a Gonzalo se os camelos falaban. De ahí xurdiu a idea da historia que relata "Palabras de Caramelo". Tamén nos fixo partícipes da súa admiración e fascinación polo pobo saharaui e contounos o fermosísimo labor que vén desenvolvendo dende fai anos, que é nada máis nin nada menos que construir bibliotecas. O seu obxectivo e levarlles libros aos nenos e nenas saharauis para que descobran o marabilloso mundo da lectura.
Os rapaces e rapazas de 4º foron os afortunados de compartir inquedanzas, experiencias e vivencias con el.





Presentounos o seu novo libro titulado "El niño de luz de plata" publicado por Bubisher, Asociación Escritores polo Sáhara. Este libro é o froito do traballo dun clube de lectura de Farsía, Smara, formado por 12 nenos e coordinado polo escritor. Ten unha finalidade solidaria, cos cartos recaudados pola súa venda, construirán unha biblioteca.


A visita de Gonzalo foi un momento realmente máxico e inesquecible, que deixou unha fonda pegada en todos nós e un montón de frases fermosas, tales como :
"Mis primeros recuerdos en color no son de la vida, son de los libros".
"Yo lo que escribo lo escribo porque me sale del alma, del corazón, no para ganar dinero".
"Los libros no se deben escribir para nada, sino por".
"Todos somos escritores, porque todos tenemos cosas que contar".
Se queres máis información preme na seguinte imaxe.


Moitísimas grazas Gonzalo, foi un inmenso pracer e un honor terte hoxe con nós. Estamos desexando que volvas axiña.

luns, 8 de xaneiro de 2018

ARTE E ALIMENTACIÓN : UNHA SABOROSA COMBINACIÓN

Co gallo do tema deste curso, a alimentación, os nenos e nenas de quinto ano de Educación Infantil, os PELOURIÑOS e PELOURIÑAS, fixeron un fantástico traballo sobre o artista italiano Giuseppe Arcimboldo. Este famoso pintor empregaba froitas, verduras, flores e animais para representar rostros humanos.
Unha vez que remataron o proxecto, quixeron compartilo  cos nenos e nenas de cuarto. Realizaron unha magnífica presentación no Bibliocastelo, empregando como banda sonora "As catro estacións" do compositor italiano Vivaldi.
Se queres comprobar o ben que o fixeron, preme na seguinte imaxe. 


Noraboa Pelouriños e Pelouriñas!


        

domingo, 24 de decembro de 2017

BO NADAL!


Con esta fermosa postal cooperativa, elaborada por todo o noso alumnado e coa colaboración das familias, dende o Bibliocastelo desexamos a toda a comunidade educativa un FELIZ NADAL!

"Que a maxia do Nadal encha todos os pratos por igual"

sábado, 23 de decembro de 2017

OBRADOIROS DE NADAL

Como todos os anos, o último día de cole do ano, celebramos os obradoiros de Nadal. Houbo de varios tipos: plástico, musical, plurilingüe, motriz...









Algúns deles estiveron relacionados co proxecto deste curso, a alimentación. Dous deles foron de cociña, elaborando riquísimas receitas. Os rapaces e rapazas de 5º e 6º decoraron madalenas con forma de árbore de Nadal. Logo fixeron brochetas con froitas e puxéronas enriba da árbore. Por último realizaron unha etiqueta personalizada na que escribiron un desexo e colocárona tamén na árbore. Na hora da merenda degustaron o que realizaron no obradoiro.  




O outro obradoiro chamouse MÁSTER CHEF COOPERATIVO.


Os nenos e nenas traballaron en grupos de 4 e 5 compoñentes, no que cada un tiña unha función (encargado dos ingredientes, preparador, decorador e empratador). Prepararon un doce con forma de bóla de neve con galletas, manteiga e coco relado e un aperitivo con forma de árbore de Nadal con pan de molde, queixo de untar, xirope e granada.


 Este foi o resultado.


No ximnasio tamén se realizou un obradoiro relacionado coa alimentación. Foi cos alumnos e alumnas de 3º e 4º. Traballaron as vitaminas. Primeiro comentaron os beneficios e as enfermidades causadas polas carencias das mesmas. Logo fixeron un circuito por equipos. Tiñan que transportar, montados en pelotas xigantes, varios alimentos ata o lugar onde estaba o cartel coa vitamina correspondente a cada alimento.






Os nenos e nenas de 1º e 2º confeccionaron un mural titulado "A casiña de verduriña". Este mural foi o broche final de todo un traballo que desenvolveron ao longo do mes de decembro sobre o libro de Ana Alonso "La casita de verdurita". Traballaron en grupos na elaboración do mural, cada un realizou unha das verduras que compoñen a casa : cenorias, berenxenas, patacas e cabaciñas. Empregaron a técnica do collage con diferentes materiais : papeis, teas, plástico... As letras confeccionáronas recortando froitas e verduras de catálogos de supermercados.








luns, 18 de decembro de 2017

VISITA DE MARÍA CORBACHO


Hoxe o alumnado de 3º, 4º, 5º e 6º asistiu no Centro Social do Mar da nosa vila a unha charla impartida por María Corbacho, autora do libro Vida Sa! , da editorial Hércules. Ademais deste libro, ten outros dous publicados sobre alimentación. Tamén é a autora do blog Un reflejo en el espejo  http://www.1reflejoenelespejo.com/. Nel atoparedes receitas, consellos e información moi interesante.


Contounos a súa experiencia persoal, o acoso que sufriu por ter quilos demais e como conseguiu adelgazar máis de cincuenta quilos seguindo unha dieta saudable.


Interactuou cos rapaces e rapazas a través de preguntas como :
Que é para ti a vida sa?
Cantas comidas fas ao día?
Almorzas?
Que alimentos tomas no almorzo?


Fíxonos reflexionar sobre a importancia que ten a mente, o concepto que temos de nós mesmos. O piar fundamental da vida saudable é sen dúbida, o querernos e aceptarnos tal como somos, cos nosos defectos e virtudes.



Rematou resumindo os piares fundamentais para vivir sa :
1.- Quérete e respéctate e fai o mesmo cos que te rodean.
2.- Come de forma saudable.
3.- Fai deporte.
4.- Le, estuda... Isto tamén é sa para ti!


Unha charla moi interesante! Moitas grazas María polos teus consellos! Foi un pracer que compartiras a túa experiencia con todos nós!