mércores, 26 de febreiro de 2014

O PEQUENO MAGO

O venres 21 recibimos a visita de Roque Cameselle, autor da historia O pequeno Mago e director da película de animación que ven de estrearse no cine este nadal.


Roque explicounos como se foron creando e a evolución dos distintos personaxes que aparecen na historia:





Amosounos como son os escenarios e como se fan:



E dunha forma moi gráfica explicounos como se elaboran as distintas escenas: empréganse uns vintecinco debuxos para obter un segundo de grabación:




Resultou moi interesante e aprendemos moitas cousas novas. 


Se aínda non coñeces a historia do pequeno mago, podes buscar o libro na biblioteca. O protagonista é un neno de nove anos que se chama Bieito Dubidoso que ten poderes máxicos. A acción transcorre na pequena cidade galega de Tui.

Agora só nos queda ver a película e por se vos queda algunha dúbida deste xenial traballo, neste video podedes ver o trailler de presentación:

luns, 24 de febreiro de 2014

O MORRAZO ESPERTA A GALICIA

Este é un video conmemorativo, no que rapaces e rapazas de varios centros do Morrazo, recitan o poema ALBORADA, coa fin de rendir homenaxe á máis grande poetisa galega de todos os tempos. 

Alborada from josean paz on Vimeo.

ALBORADA DE ROSALÍA DE CASTRO

Tal día como hoxe, 24 de febreiro, nacía en Santiago de Compostela, Rosalía de CAstro, a figura máis insigne das nosas letras.

Para conmemorarlo, este ano, queremos rememorar o seu poema ALBORADA






Vaite noite vai fuxindo
Vente aurora vente abrindo 
co teu rostro que sorrindo
a sombra espanta!!!



Canta,
paxariño canta
de ponliña en ponla
que o sol se levanta
polo monte verde
polo verde monte
alegrando as herbas
alegrando as fontes!...


Canta,
 paxariño alegre,
Canta
Canta! porque o millo medre.
Canta porque a luz te escoite
Canta!
Canta que fuxiu a noite.
Noite escura
Logo ven
e moito dura
co seu manto 
de tristura,
con meigallos
e temores,
agoreira
de dolores,
agarimo
de pesares,
cubridora
en todo mal,
sal!...

Que a auroriña
o ceo colora 
cuns árbores 
que namora,
cun sembrante
de ouro e prata
teñidiño 
de escarlata.
Cuns vestidos
de diamante
que lle borda
o sol amante
antre as ondas
de cristal.
Sal!

Señora en todo mal,
que o sol
xa brila
nas cunchiñas do areal.
que a luz
do día
viste a terra de alegría,
que o sol
derrete con amor a escarcha fría.

Branca aurora
ven chegando
ás portiñas
van chamando
dos que dormen
esperando o teu folgor!...



Canta,


paxariño canta
de ponliña en ponla
que o sol se levanta
polo monte verde
polo verde monte
alegrando as herbas
alegrando as fontes!...

Cantar 
dos aires
paxariño alegre,
canta, 
canta porque o millo medre.

Cantar 
da aurora
alegre namorado,
ças meniñas dille
que xa sal o sol dourado;
que o gaiteiro,
ben lavado,
ben vestido,
ben peiteado,
da gaitiña
acompañado
á porta está!
Xa!...
Se espricando
esprica
que te esprica
repinica,
repinica
na alborada
ben amada
das meniñas
cantadeiras,
bailadoras,
rebuldeiras;
das velliñas
alegriás,
das dque saben 
ben ruar.

Arriba
todas, rapaciñas do lugar!,
que o sol
i a aurora xa nos vén a espertar.
Arriba!
Arriba, toleirona mocidad!,
que atruxaremos
cantaremolo alalá!!!...

Este é o noso pequeno homenaxe a Rosalía na entrada do cole, ademais durante esta semana escoitaremos no corredor da biblioteca algúns dos seus poemas musicados.


xoves, 20 de febreiro de 2014

ENTROIDO DE CÓMIC

Xa está aquí o Entroido e co gallo do noso proxecto sobre a Banda Deseñada todo o centro prepara os seu traxes de personaxes de cómic.
Neste enlace ao blog ENTRE VIÑETAS podedes ir vendo algunhas das actividades que se están a facer:


Nesta páxina, dedicada ao entroido, atoparedes recursos, unidades didácticas e actividades recompiladas pola Coordinadora Galega de Dinamización Linguística

martes, 4 de febreiro de 2014

CELEBRANDO A PAZ

Este ano dedicamos a celebración do DÍA DA PAZ a NELSON MANDELA, como homenaxe polo seu recente pasamento. 
Nos días previos, nas distintas titorías, traballouse a figura deste home, símbolo mundial da loita polas inxustizas que cambiou a historia de Sudáfrica. Os rapaces e rapazas coñeceron a súa traxectoria vital e as súas aportacións, a través de videos e actividades varias.
Cada aula escolleu unha frase célebre de Mandela e con todas elas elaboramos un mural que se atopa na entrada do cole.


" A educación é a arma máis poderosa que podes usar para cambiar o mundo" 


"Derribar e destruír é moi fácil. Os héroes son aqueles que constrúes e traballan pola paz"


 " A xente ten que aprender a odiar, e se eles poden aprender a odiar, tamén se lles pode ensinar a amar, o amor chega máis naturalmente ao corazón que o seu contrario"


 " A liberdade é inútil se a xente non  pode encher de comida os seus estómagos, se non pode ter refuxio, se o analfabetismo e as enfermidades seguen perseguíndonos" 


"A arma máis potente non é a violencia senón falar coa xente. Gústanme os amigos que teñen pensamentos independentes, porque adoitan facerche ver os problemas desde todos os ángulos"


" Despois de escalar unha montaña atópase só con que hai moitas máis montañas que escalar"



" Necesitamos situar a erradicación da pobreza no primeiro lugar das prioridades mundiais. Temos que ter claro qeu todos compartimos unha humanidade común e que a nosa diversidade en todo o mundo é a maior fortaleza do noso futuro conxunto"


" A pobreza non é natural, é creada polo home e pode superarse e eliminarse mediante accións dos seres humanos. E erradicar a pobreza non é un acto de caridade, é un acto de xustiza" 


´"Ninguén nace odiando a outra persoa pola cor da súa pel ou a súa orixe ou a súa relixión"


"Non me xulgues polos meus éxitos xúlgame polas veces que caín e volvín a levantarme"



"Aprendín que a coraxe non era a ausencia de medo, senón o triunfo sobre el. O valente non é quen non sinte medo, senón aquel que conquista ese medo"




" A educación é o gran motor do desenvolvemento persoal. E a través da educación como a filla dun campesiño pode converterse en médico, o fillo dun mineiro pode converterse no xefe da mina ou o fillo de traballadores agrarios pode chegar a ser presidente dunha gran nación"


" A maior gloria na vida non consiste en non caer, senón en levantarnos cada vez que caemos"


 O xoves 30 de xaneiro todos xuntos saímos ao patio para ler estas frases...



Para rematar o acto cantamos as cancións que estiveramos a practicar nos últimos días :

"Campás pola paz" do disco Pan de Millo do grupo Migallas



E "Mandela Day" de Simple Minds




domingo, 2 de febreiro de 2014

RECREOS DE CONTO

Nesta ocasión os alumnos e alumnas de sexto de primaria sorpréndennos coa representación de CORRE, CORRE CABACIÑA pero, nada máis e nada menos que en inglés. 
Este libro da editorial OQO, escrito por Eva Mejuto e ilustrado por André Letria, é un conto popular portugués de gran tradición que nos relata a historia dunha velliña que, de camiño ao casamento da súa neta, atopa un lobo, un oso e un león que a queren comer...




Moitas grazas rapaces e rapazas, gustounos moito!!!



RECREOS DE CONTO

O alumnado de sexto sorprendeunos, hai uns días, coa representación do conto de OQO "PEDRA, PAU E PALLA" escrito por Ana Presunto e ilustrado por Josep Rodés.
O libro cóntanos a historia dun leñador que ten tres fillas. Cada vez que o leñador vai ao bosque, deixa un rastro para que elas o atopen sen problemas. Deste xeito, as tres cativas cando lle leva a comida ao seu pai, van por un carreiro sinalado con pedras, paus e pallas. Pero...



Moitas grazas rapaces e rapazas por facernos pasar un recreo tan divertido!!!