xoves, 12 de xuño de 2014

ANTONIO SEIJAS NO BIBLIOCASTELO

Hoxe tivemos a fortuna de contar con ANTONIO SEIJAS no Bibliocastelo.


Falounos de "CARTAS DE INVERNO" libro de Agustín Fernández Paz que el ven de adaptar a banda deseñada e que o noso alumnado de sexto estivo lendo este curso.


Aprendemos algúns trucos sobre as cores e a súa importancia na ilustración porque son unha  ferramenta que se debe aproveitar ben. As cores transmítennos a atmosfera, a ambientación da historia e incluso os sentimentos ou os estados de ánimo.


Antes de rematar agasallounos cun marabilloso debuxo no que se reflexa unha escena do libro.



Aquí está o resultado final con dedicatoria e todo. 
MOITAS GRAZAS ANTONIO polo teu tempo!!!

luns, 9 de xuño de 2014

LIM BANDA DESEÑADA

Como remate ao noso proxecto "ENTRE VIÑETAS" centrado no mundo do cómic, aquí tendes unhas actividades para repasar o aprendido:


sábado, 7 de xuño de 2014

AN ALFAYA VISITA O NOSO BIBLIOCASTELO

Onte tivemos a fortuna de contar cunha visita excepcional no noso Bibliocastelo, a escritora viguesa An Alfaya, quen, ademais de falarnos dos seus libros, agasallounos con confidencias da súa infancia. 

Daquela, era una nena tímida e solitaria cunha chea de soños, poesías e historias que contar. Escribía sempre que podía. 


Mesmo na clase, en canto remataba as súas tarefas, aproveitaba para dar renda solta ao seu maxín que viaxaba coas máis inusitadas escusas, como o lene voo dunha bolboreta.


Veu compartir connosco un anaquiño do seu tempo porque este ano os mozos e mozas de 4º e 5º leron dous dos seus libros, ZOA E AZOR e A ÁNFORA EXIPCIA  respectivamente.


Trátase de dúas narracións moi distintas, pero cunha característica común: a autenticidade dos seus personaxes. As súas inquedanzas, as súas angustias, os seus defectos e as súas virtudes son tan humanos, tan reais, que atrapan o lector nun labirinto emocional. Temas como a honestidade, a amizade, a fidelidade, a confianza, a envexa, a traizón e a decepción conducen á empatía, á reflexión e á tolerancia. Son, sen dúbida, libros para medrar.



GUÍA DE BANDA DESEÑADA

Co gallo do noso proxecto  "Entre viñetas" publicamos esta Guía de lecturas sobre o cómic con títulos para todas as idades e gustos. Mira ben e seguro que aínda che queda algún por ler!!!

venres, 6 de xuño de 2014

E SEGUIMOS APADRIÑANDO E AMADRIÑANDO LECTORES

Estes días de primavera o Ceip Plurilingüe A Pedra encheuse de contos e historias. Ninguén quixo quedar sen apadriñar ou ser apadriñado: libros nos corredores, libros nos patios, libros na biblioteca, libros nas aulas, ... libros, libros e máis libros...